Nesta escuela somos mui teatreros

Queda claro que nesta escuela somos mui, pero que mui teatreros. Escolinos y escolines de cuartu y de sestu cursu de Llingua Asturiana del CEIP San Félix, participaron nel VI Certame de Teatru Escolar en Llingua Asturiana pa Educación Primaria, que con motivu de la cellebración de la XL Selmana de les Lletres Asturianes, convocó la Conseyería d’Educación y Cultura del Principáu d’Asturies.

Los neños y neñes de sestu presentaron al concursu “El peñe d’oru”, una obra perprestosa en tres actos que xira al rodiu la Mitoloxía Asturiana, que foi’l tema central del Magüestu esti cursu na escuela. Esta obra, con La Xana perguapa de protagonista, cunta tamién con otros personaxes como El Trasgu, El Cuélebre, El Busgosu, El Diañu, La Güestia y L’Home’l sacu.

Per otru llau, escolinos y escolines de cuartu cursu, presentaron la obra “Los ciruxanos candasos corten pelo sano”, una comedia qu’al traviés d’una escena cotidiana nun consultoriu médicu, fai una crítica social puxando pola escuela y la sanidá pública, pola música y el teatru n’asturianu, por xugar na cai colos collacios como se facía enantes… .Pero perriba de too glaya porque se respete la Llingua Asturiana como se merez, como a toles llingües, y porque s’utilice la en tolos contestos de la vida.

Con “Los ciruxanos candasos corten pelo sano”, los escolinos y escolines de cuartu, llograron el “Segundu Premiu a la Meyor Obra” y el “Primer Premiu al Meyor Guión Adautáu” nel VI Certame de Teatru Escolar en Llingua Asturiana pa Educación Primaria de la Conseyería d’Educación y Cultura d’Asturies. Premios que recoyeron nuna gala perprestosa que se cellebró nel Teatru Palaciu Valdés d’Avilés.

Pa cellebrar too esto, per un llau’l bon trabayu que ficieron tanto los escolinos y ecolines de cuartu como los de sestu (equí los premios nun mos importen, impórtenmos les ganes, l’actitú y l’interés que se ponen pa facer les coses), y per otu llau la XL Selmana de les Lletres Asturianes, el CEIP San Félix en collaboración col Teatru Prendes de Candás, organizó una Xornada de Teatru Escolar onde se representaron les dos obres de teatru y canciáronse cancios de “Xentiquina” y “Pop Piquiñín”, pa que se notare qu’esta Selmana de les Lletres tuvo dedicada a la música n’asturianu.

Darréu dexámosvos los enllaces pa que podáis ver les obres de teatru y unes cuantes semeyes tanto de la gala de premios como de la cellebración nel Teatru Prendes.  Esperamos que vos preste .

¡Munches gracies a toos y a toes por too!

Obra de teatru de Los Ciruxanos Corten Pelo Sano.

Obra de teatru del Peñe d’oru.

También te podría gustar...

Deja un comentario

Tu dirección de correo electrónico no será publicada. Los campos obligatorios están marcados con *